بحلم اني اقوم مـ النوم الاقيني في حلم وكان الحلم مجرد واقع
وتبئا حياتي خيال في خيال
وابئا رئيس في زمان الرؤساء فيه بيكونو عيال
وينفذو لشعوبهم أحلام تافهه تخلي الدنيا مجرد اوضة لعب
يبئا الشيخ محتار جواها ينفخ بلاليين ولا ينط حبال !
واللي فوق العشرين يقعدو يلعبو سيجا ويعيطو عمال علي بطال
والاطفال !
يقعدو علي مكتب , يلبسو نضاره ويكتبو أشعار
وهما اللي يحددو مين المحظوظ اللي هيكسب اخر اليوم دبدوب
ويدوب يشخط عيل كل الباقي يفز و يغنيلهم غنوه
ويرددو وياه " حطه يا بطه "
بـحلم بالبيت اللي يكون فيه البنت مهما ان كان سنها يتقالها " ماما "
تبئا الـ ماما عمرها سبعه
ويغلط واحد عمره سبعه , فوق الستين
تضربه علي ايده وتحذره , إيـاك تتكلم تاني في دي المواضيع
يـا ميؤسين .. وهنعمل ايه
يــا صغيرين .. باللي احنا فيه
ازاي تغلط وتفكرنا ان انا عايشين في حياه
ليه متقولش ان حياه مثلا هي العايشـه وهي الباقيه !
واننا ولا نفرقش عن بعضنا بالسن .. ميتين ؟
والـ ماما كلامها مظبوط
تسمع دوشه , فتدخل فـ الكل يتكتم
تسأل .. ليه عاملين دوشه
فتعرف ان الناس كلها جعانين
تضحك وتقول .. !
عمر ما كان الحل سكوت .. بس اكيد , عمر الحق ما جه بالصوت .
فـ الكل بيسكت
وتخش الـ ماما التانيه وعمرها تسعه وشايله يدوبك أكله
معرفش اسمها هيكون ايه :)
انا بحلم بنهاية عالم
وبـداية عالم تاني
فيه نكسر كل القوانين
وكل شئ فيه مجاني
مش تخسر عمرك علشان ملايين
ولا تكره عمرك علشان ملاليم
انا بحلم بحياه متلونه ألوان الحلم
ألوان ولا نعرف اسمها ولا نعرف نوصفها لحد
انا بحلم بحياه انا عن نفسي عايشها مع نفسي
بس منيش هتمتع بيها غير لو قرر كل الناس تشاركني
نفسي !
عبدالرحمن سامي
3/7/2012
0 عايز تقول رائيك؟:
إرسال تعليق