عاكـس مـعكوس









بيقولوا في المثل الـمصري " الجواب بيبان من عـنوانـــه 
لـذلك غتاته مني , اخترت عنوان ملوش اي صله بالموضوع :) 


عندي حاحتين اتنين عايز اكتبهم وأعبر عنهم , بس مش عارف هعرف أعبر ببساطه ع اللي في دماغي ولا هتوه في الكتابه 
عمـوما نحاول نكتب ونحكم ع الموضوع في الاخر بـئا :) 


الموضـوع ليـه علاقه باللي انا بعمله دلوقت واللي هـو الكتابه أو بـمعني أصح الكاتب نـفسه 
بإختلاف المواضيع والطرق واللغات والثقافات اللي بيتكتب بيها الشئ اللي في النهايه انت بتقرأه او بتسمعه او بتتفرج عليه 




اول حــاجه 


مـعظمنا بيـسمع أغاني , وكتير مننا حافـظ اغاني بعدد شعر راسـه 
بـس الاكيد ان في اغنيه واحده بس لما جه يسمعها حس ان هـو اللي مغنيها 
او بمعني بلدي , جـه يسمع اغنيه غنت عليه 
كل كلمه فيها , كل حرف , كل نفس بيطلع من المغني بيحس ان المره دي مختلف 
المره دي شكله بيتغنا عـليه مش بيغني :) 


تاني حاجه 


مش معظمنا بيقرأ كُتب :) 
فبتلاقي اللي بيققرأ كتب سواء لكُتاب مشهورين قدام او جداد كُبار او شباب اي حاجه 
فتييجي تقرأ الكتاب , تـحس ان الكتاب هو اللي بيقراك 
تـحس ان اللي كاتب ده كان بيراقبك بقاله خماشر طمناشر سنه وبعدين كتب بئا سواء احداث حصلتلك 
او صفات فيك , او مواصفات أقرب الاقربين ليك ميعرفهاش عنك حتي 
فتلاقيـك بكل بساطه مبتسم وانت بتقرأ الكتاب ده حتي لو كتاب تافه :) تحس ان مسيرتك من زمان انك تقرأ كان هدفها الاول والاخير هي انك توصـل للكتاب ده 


تالت حاجه 


معظمنا بيدخل سينما , ده اكيد :) 
عـمرك دخلت تتفرج علي فيلم حسيت انك اتعريت .. !! 
او بمعني أنضف , انك بتتفرج علي نـفسك , او علي بـطل فيه كل صفاتك بالظبط بس في احداث مختلفه بعض الشئ او في احداث مماثله بعض الشئ برضو فتخاف ان حد من اصحابك يشوف الفيلم ده , او تـسعي انك تخلي كل اللي يعرفوك يـشوفو الفيلم ده لو انت فرحت بيـه ؟؟ 




فـي الحقيقه ودي الخلاصـه بئا 
وبـما ان العنوان ملوش دخل بالمقدمه والمقدمه ملهاش دخل بالموضوع اذا الموضوع ملهوش دخل بالنهايه :) 


انا لا اؤمن بـشئ اسمه ابداع كاتب , خـصوصا في بلد زي بلدنا دي 
سمعت مره مؤلف مش فاكر اسمه كان في حوار ليه وقال : احنا بنكدب علي روحنا بالتأليف , لفه واحده في شارعين في مـصر ( يـلهموك ) انك تكتب عشر أفلام 
انا بئا مسـكت في الكلمه دي " الإلهام " 
وبـعد بـحث طويل وقراءة بـعض المقالات والمراجع اللي قدرت افهمه حاجه واحده بس 
فرق واضـح بين الابداع والإلهام


في اللغه الابداع يـعني : اختراع شئ او اختلاق حـاله لا مثيل لها من قبل 
والمبدع هو: المنشئ أو المحدث الذي لم يسبقه أحد.
في القرآن الكريم: "بديع السماوات والأرض" : أي خالقها على غير مثال سبق.


وبحثت عني معني الإلهام خصوصا في الكتابه , ملقتش معني اكثر وضوحاً من 
" الإلهام هـو سلاح الفنان " 
من وجهة نظري برضو انك بتتأثر بأي موقف تشوفه او يتحكيلك وتـحاول تستخرج منه بنفس الظروف او الابطال قـصه تانيه خـاااالص او نهايه مختلفه غير النهايه اللي كتبها مؤلف مـا 


علي العموما انا عندي تحـفظ علي كلمة " فنان " اساسا , وعندي موضوع قبل كده قايل فيه رائي كان اسـمه 
" هل انت فنان ؟ " 
تقريباً الاسم كان كده , ابـحثوا عنه في جـوجل
وعموما الموضوع خلص ومش مهم تفهم حاجه منه لان هو ده بالـظبط الإبداع :) 


يـعني ما تتخضش لما تقرأ كتاب تحس انه بيحكي عنك 
او تـسمع اغنيه , وتحس انها جت ع الجرح زي ما بيقولو
او تتدخل فيلم تحس انك بتتفرج علي حـياتك 
ده لانـك مش عايش لوحدك في الحياه 


ملحوظه هـامه 
كل اللي فات ده ملوش علاقه بإنك تشوف فيلم وتقلد البطل سواء خير او انحراف 
او تسمع اغنيه وتعيش نفسك في الجوو بتاعها والسلام 




كـاتبي المـُفضل هو الذي يـقرأني ويـعلمني قرأة الواقـع بشكل مختلف في كتاباته , ليس فقط مـجرد كاتب يكتب وأقرء انـا , فأنا لست غبي , وكاتبي المـُفضل ليس طـباخ لكلمات يـصنع منها بـعض الأشكال المختلفه وبعض الحلوي .
" عـبدالرحمن ســامي









0 عايز تقول رائيك؟:

مازلت عايش في الحياه بكيفي