انــا اليومين دول

فـكره خطرت في بالي اني اكتب ايه الاحاسيس والافعال اللي انا فيها اليومين دول 

ففكرت وكتبت شوية تدوينات ومنها :

انـــا اليومين دول 

.

.

.

  

1 / مقضيها نوم

2 / بقيت ألبس ( دبله ) مش فاهم ليه

3 / مليش نفس ألعب بلايستاشن خالص ( مع اني مدمن )

4 / بتفرج كل ليله قبل ما انام علي فيلم أبيض واسود

5 / مقل جدا في السجاير وده لسببين :

 ـ أولهم معييش فلوس

ـ ثانيهم اني بنام كتير

6 / مليش نفس اخرج من البيت ومنزلتش الجامعه غير يوم واحد بس

7 / بحلم أحلام غريبه , ومبفهمش منها اي منكش

8 / مبسمعش أغاني غير قليل جدااااااا

9 / كالعاده مش مواظب  في الصلاه – ونفسي اتعدل واتلم بئا

10 / حاسس ان في مصيبه هتحصل قريب جداااااا بس مش عارف في ايه بالظبط

11 / بفكر بجد ان لو في فرصه اني احب بجد هعمل كده , بعيد بقالي فتره عن المواضيع دي

12 / دايما عندي صداع طول الوقت , وحاله غريبه مخلياني ميال للنوم علي طول حتي لو لسه صاحي

13 / نشاطي قليل اوي ع النت , نادرا ما بفتح الفيس بوك او اي موقع واقعد اكتب

14 / عندي هاجس اني أعيش في القاهره بشكل شنيع , مع اني نفسي اعيش في بلد ساحلي

15 / بفكر أروح كورسات , لاني مفتكرش اني ناوي احضر محاضرات الترم ده علي الاقل

16 / مبسوط اوي بردود الناس علي كتابي الجديد ( هرتله مصريه ) كل يوم ناس بتكلمني وده من فضل الله عليا

17 / مليش نفس أكمل القصه اللي بحلم أخلصها واللي كتبت اكتر من نصها لحد الان :

وتحمل اسم ( زيــاد )

18 / بـشرب شاي كـتـيــــر مع اني مكنتش بحبه خـالص

19 / نادرا لما اقعد اتكلم مع امي او ابويا , ونادرا ما بشوفهم بسبب ظروف نومي

20 / حاسس ان انا ممكن أكون كاتب مشهور فعلا , وده اول مره اصدق من جوايا الكلام ده

21 / تقريبا مابشوفش الشمس خالص , مع ان احلي يوم في حياتي لما يبدء من الساعه 6 الصبح ع السطح كده مع كوباية الشاي والسوجاره وقلم وورقه واكتب اي حاجه

22 / مفتقد جدا للمة أصدقائي , وواحشني واحد واحد حقيقي , بس ده مني لاني مش بخرج زي ما قولت

23 / بحضر ألبومي الجديد وهيحمل تقريبا اسم ( مشوار الغرام ) مستني بوستر الالبوم من عبدالحميد صديقي , وبعد كده أرتب الاغاني واظبط كل حاجه وبعدين أنشره

24 / حاسس اني بقيت بارد جدااا , وفقدت تماما حبة العصبيه الصغيرين اللي عندي , رغم اني لسه بعاني من تسرعي وهبلي أحيانا

25 / مــبستحماش هههههههه

26 / بـفكر أبحث عن موقع أو جريده أكتب فيها , وغالبا هتكون جرايد محليه او مواقع محليه واكيد هتكون تبع الـ منصوره

27 / مبقاش ليا حمل اتكلم في السياسه ولا أتابع برامج التوك شو

28 / حقيقي حاسس اني بعيد نفس السنه اللي سقط فيها في الكليه من تلت سنين وربنا يستر

29 / عليا 2.5 جنيه لموبينيل وده من فتره كبيره ومش راضي أشحن عشان ميخدوهمش وبعت رساله لنجيب ساويرس علي تويتر بطلب اننا نجدولهم بس مردش لسه :)

30 / نسيت تقريبا ان معايا موبيل , محدش بئا يعبرني ولا انا بعبر حد وداخل في مرحله من التوحد تقريبا ممرتش بيها غير من اربع خمس سنين

انــا اليومين دول ,

 مــبضون

 متناقــض

متفائــل

مـجنون

هــادي

فــاضي

مــحتار

مـستوحد

وبالطـبع

نـــايم

FaceboOk