لحظتين من فضلك

تخيل كده ...

أسره مكونه من خمس أفراد .. الاب والزوجه وولدين وبنت 

الاسره مسلمه ولكن مع بعض طول حياتهم زي ناقر ونقير 

قبل الثوره كل أحاديثهم وخناقاتهم كانت عن مين السبب في البطاله ؟؟ 

1 / الشباب اللي مضيع وقته ومش عايز يتعب 

2 / أحمد عز 

وكانو برضو بيختلفو في اسباب وجود العشوائيات في مصر ؟ 

1 / ربنا عايز كده 

2 / أحمد نظيف 

واتخانقو برضو في مره علي مين مسؤل ومين في رقبته دم الواد الي اتمسل بجتته في لبنان ؟ 

1 / الشاب اللي مات هو اللي جاب لنفسه الهلاك 

2 / أحمد أبو الغيط 

اتخانقو كتير عن سبب أزمة السكن ومين سببها ؟ 

1 / الشعب بيكبر مره واحده والحكومه هتلاحق علي مين ولا مين 

2 / أحمد المغربي 

واكبر خناقه بئا كانت مين غلطان في موضوع الـ (CD )  ؟ 

1 / الصحافه عشان بتدي اهتمام بناس تافهه ؟ 

2 / أحمد شوبير 

المهم 

وبغض النظر ان لازم يكون في سبب من الاسباب اسمه (( أحمد )) الحمد لله حالهم اتعدل بعد الثوره 

(( اسبوع بس )) 

الاب ... مسلم ,, ليبرالي 

الابن الكبير ... مسلم ,, علماني 

الابن الاصغر ... مسلم ,, (( إسلامي )) 

والام ماشيه مع جوزها 

والبت ماشيه مع حسام ابن الجيران 

المهم 

في بداية الثوره كان كل واحد فيهم ليه وجهة نظر 

الاب .. شايف ان السبب هي الداخليه وجبروتها 

الابن الكبير .. شايف ان السبب كان ان الناس كاتمه صوتها بنفسها ويستاهلو اللي كان حاصلهم 

الابن الاصغر .. كان شايف ان اللي غلطان في الموضوع كله ؟؟ (( ابوه واخوه )) 

بقدر ما الثوره جمعتهم في الاول انهم يتفقو علي فكر واحد 

الا ان نفس الثوره هي اللي خلتهم يرجعو زي الاول واكتر 

يوم جمعة الشريعه .. الابن الصغير راجع البيت بليل بئا طاير من الفرحه 

كل همه هو تطبيق الشريعه 

دخل علي ابوه واخوه اللي قاعدين في الصاله متنكد عليهم 

ــ السلام عليكم ورحمة الله وبركاته 

رد الاب والابن الكبير السلام ثم قال الابن الاكبر 

ــ اهلا يا شيخنا اهلا .. جلاليبكو كانت منوره الميدان النهارده 

نظر الابن الاصغر الي اخوه نظرة واحد مش طايق نفسه وقاله 

ــ الحمد لله .. ولكن النور كان من اهل العلم وأسيادنا في الميدان 

رد الابن الاكبر : 

ــ انت يلا مش مكسوف من نفسك .. مش كفايه كنت بتقول ع اللي ماتو كفار وحرام الخروج ع السفاح مبارك ؟ 

ــ والحمد لله عرفت من الشيوخ والعلماء انهم شهداء بإذن الله عند ربنا 

ــ طب وانت ملكش تفكير يا ابني ؟؟ هو اي حاجه الشيوخ تقولها يبئا هما الصح ؟ 

ــ اومال امشي ورا مين ؟؟ امشي ورا ساويرس والبرادعي ؟؟ 

ــ ياعم ما تمشيش ورا حد .. فين تفكيرك انت ؟؟ وهما يعني كفار ؟؟

ــ تفكيري هو تفكير المشايخ اللي بيفنو عمرهم كله في طاعة الله وهم اقدر منا علي فهم الواقع 

ــ لا والنبي !! 

ــ بعد اذنك ممكن بئا تقطع الكلام ده وتبطل تفكيرك العلماني بتاعك ده يا ابني انت ماشي في سكة الكفر ربنا يهديك 

ــ كفر ؟؟ سامع يا بابا .. بيكفرني عشان بنتناقش 

ــ ده ما اسمهوش نقاش انت اللي بتتخانق معايا 

ــ وحتي يا اخي لو بتخانق يبئا كده كفرت ؟؟ 

مازال الاب يجلس علي الكرسي ويتابع الحديث بين ولداه وتنتابه حاله من الخنقه 

فهب فيهم قائلا : 

ــ انتو مش هتبطلو تخلف بئا .. ده انتو اخوات ؟؟ اومال انت مع الناس اللي ضد تفكيرك في الشارع ايه ؟؟ وانت زيه ؟؟ بتعملو ايه ؟؟ 

جاءت الام وقالت :

ــ والنبي تهدي نفسك يا اخويا سيبك منهم 

ــ قوليلهم حاجه يا ستي قولي لاولادك انهم اخوات 

رد الابن الاصغر : 

ــ انا أحترمه ولكن لا أحترم العلمانيه التي يؤمن بها 

رد الابن الاكبر : 

ــ وانا أحترمه ولكن لا أحترم السطحيه التي يؤمن بها ؟؟ 

قال الاب في هدوء ..

اسمع ياض منك له انا هسأل كل واحد فيكو سؤالين وعايز الاجابه 

انت يا كبير .. انت مسلم ؟ 

ــ الحمد لله مسلم 

طب توجهك السياسي ايه ؟ 

ــ انا بميل لفصل الدين عن الدوله .. ولا يعني ذلك اننا نعيش في كفر لكن انا فكري ان يكون الدين له مؤسساته التي تدعي له هو يعني لو شيخ من بتوعه دول مسك الدوله وجه خرب فيها .. هيقدر هو يخرج عليه زي ما بيقول ؟؟ 

طب بس اسكت .. وانت يا سيدنا الشيخ مسلم ؟ 

ــ الحمد لله وليا الشرف 

وتوجهك الفكري والسياسي ايه ؟ 

ــ انا مسلم فقط ,, هو بئا علماني وحضرتك ليبرالي مليش دعوه انا مسسسسلم وبس

بص يا ابني 

انا سألتك عن الديانه فقولت مسلم وهو قال مسلم 

وسألتو عن توجه السياسي قال بيميل للعلمانيه مع انه مسلم .. لكن انت قولت انا مسلم ووهو علماني 

انت ليه يا ابني حاطط الديانه في خانة التوجه السياسي ؟؟ 

ده ربنا هيحكم بينا وبين اللي مش مسلمين في امور الاختلاف بينا .. عارف يعني ايه اختلاف بينا ؟

يعني اختلاف في الدين اللي احنا عليه ومؤمنين بيه .. اومال يا ابني لو اتعاملت مع واحد مسيحي ولا حتي ملوش مله هتعمله ايه ؟؟ هتقتله ؟؟ 

ربنا قالك اللي يعصيني ادبحه في الارض ؟؟ ربنا قالك اللي يفكر عكسك اقصيه من الحياه بالنسبالك ؟؟ 

الدين ــــــــــ معامله 

لو انتو بتفكيركو ده مش هتعرفو تتعاملو مع بعض 

فقولو ع البلد دي يارحمن يا رحيم 

انا داخل انام