عارف اللي عمل الرصيف مخده ونام ده مين ؟
ده بلتجي من بلتجية التحرير
عارف صفاتهم ؟
اعرفك انا لو متعرفش
مهو عشان نعرف نكرههم صح وناخد موقف لازم نتعرف عليهم
اتفضل يا سيدي
مواصفات بلطجية التحرير
1 / حب مصر
( فعل مش كلام )
2 / الحرص علي تحقيق العداله الاجتماعيه
( مش هنعمل ثوره ويستفيد منها الموظفين الفاسدين ويقولولنا مفيش شغل )
3 / ان يكون من الطبقه الوسطي ليظهر كأنه شحات
( او الطبقه السفلي او الطبقه السراميكيه _^^_ )
4 / المطالبه بتحقيق عدل ربنا والقصاص
( ولكم في القصاص حياة يا أولي الالباب )
5 / الضغط علي المجلس العسكري لتحقيق مطالب الثوره
( مهو جابلهم الضغط والسكر والمراره والخ الخ الخ )
6 / مخالفة الاخوان
( واولاد العم .. والحدق يفهم )
7 / عدم الصبر
( عشان لسه الثوره خلصه من يومين مش من ست اشهر ولا حاجه )
8 / اغلاق مجمع التحرير والتسبب في حاله من الاكتئاب للموظفين جرا منعهم من أداء واجبهم
( بما اننا اليابان بئا )
9 / رفض بيان المجلس العسكري بحجة اننا مبنتهددش
( علي اساس انهم خافو من مبارك !! فيهخافو من الفنجري )
10 / النوم في الشارع
( ياي )
11 / لهم أجنده
( تلت كرسات وكشكولين 56 ورق أبيض فاخر من مصانع مرجان احمد مرجان )
12 / الاسمئزاز من شعار التلفزيون المصري
( وقربو يكرهو الهرم بسببه )
13 / بيعطلو عجلة الانتاج
( كابتن كابتن ممكن لفه بالعجله دي )
14 / بيغنو وبيعلو صوتهم
( الغناء حرام شرعا بعد الثوره .. الحدق يفهم )
15 / بيطالبو بالدستور أولا
( طيب يعني ناس بتفهم !! )
و
( المطلب ده اتنحي علي جنب الان المطالبه بحق الدم )
16 / بيعطلو المرور
( مصر كانت براااااااااااااااااح وجم هما زحموها )
17 / قله مندسه
( التلفزيون المصري _^^_ )
18 / المصري الوحيد اللي بيمسك بلطجيه
( وباقي مصر مليانه بلطجيه _^^_ )
19 / بيكرهو الشرطه
( مع ان الشرطه طيبه وبنت حلال وتتحب من اول رصاصه )
20 / بيتريقو علي خلق الله _^^_
( خلق الله = اللي ماسكين البلد )
21 / عيال مورهومش حاجه
( حوش حوش .. انت اللي وراك _^^_ )
و
( طب ما تعملولهم مشروع وطني ينقذ البلد وقبل كل ده نفذولهم مطالبهم الشرعيه او غير ده كله ممكن تعملولهم سندوتشات حلاوه بالقشطه )
22 / هيضيعو البلد
( التلفزيون المصري تاني _^^_ )
23 / شكلهم مقرف
( روح بص في المرايا _^^_ )
و
( شكلهم كده عشان مبيستحموش ههههههه فعلا مش هزار .. مديين وقتهم للبلد ومش فاضيين يستحمو يعملولك ايه يعني ؟ )
و
( عيب تتريق علي شكل حد )
24 / أشرار
( حاضر يا نايتي _^^_ )
25 / بيطالبو مطالب فئاويه
( تابع الاخبار من أي حته الا التلفزيون المصري _^^_ )
حد الله ما بيني وبينك يا حكومه غير حب البلد دي
حد الله ما بيني وبينك يا مجلس يا عسكري غير حب البلد دي
حد الله ما بيني وبينك يا صحبي غير حب البلد دي
حد الله ما بيني وبينك يا مبارك غير دم اخواتي ودمار بلدي
اللي عنده مواصفات تانيه يبعتلي عشان اضيفهم
عشان نفيد بعض
0 عايز تقول رائيك؟:
إرسال تعليق