عنبر 4







صباح يوم الثلاثاء 20/7/2014 الموافق الرابع والعشرون من شهر رمضان في ذلك الوقت .. 
الحاله : مانمتش بقالي يومين .. 
السبب : رايح أسمع سلاحي في الجيش 
المكان : منطقة تجنيد المنصوره .

( بعد 6 ساعات لطعه في الشمس واحنا صايمين في نهار رمضان
اخيراً اتعطف علينا عسكري وجه بشوية ورق عشان ينده ع الاسامي ونشوف السلاح .. 

- ركزوا معايا يا رجاله بعد اذنكوا , اللي هنده علي اسمه يطلع بسرعه وياخد ورقته عشان احنا صايمين مش عايزين نتعب بعض

وبدأ الفيلم المُخيف .. اللي لاحظته ان كل اربع او خمس اسماء ورا بعض بيكونوا نفس السلاح !! 
بعض شويه .. اتنده اسم " فولان " .. سلاحك كفاح شعبي .. 
اللي بعده ( عبدالرحمن سامي محمود ) .. 
فرحت فرحه عارمه قبل ما اقوم من مكاني واروح اخد الورقه واشوف السلاح , مهو اكيد زي اللي قبلي " كفاح شعبي " وهقضي الجيش في البيت .. 
بعد ما وصلت للعسكري وبمد ايدي اخد الورقه " وقعت الورقه ع الارض " وطيت اجيبها وفجأه لمحت اسم السلاح .. 
- كابتن , هو ده سلاح ايه ..؟ 
مُشاه 
- شكراً يا كابتن ..!! 

الدنيا سكتت مره واحده , انا دخلت مُشاة ..؟ 
أوسخ سلاح في الجيش ..؟ 
مش كفايه اني دخلت الجيش أصلاً !! 
وكمان مُشاة ..؟ 
مش كفايه ان دفعتي الاصليه أخدت تأجيل 3 سنين وبعدين إعفاء نهائي ..!! 
كان لازم أقعد في الكليه زياده عن اللزوم !! 
مُشاة ..!! يعني مش جويه ولا دفاع جوي !! 

بدأت السيجاره تجيب سيجاره تجيب سكوت وأسئله ..!! 
هو انا ليه دخلت الجيش ..؟ 
هو انا ليه دخلت مُشاة !! 
انا واخد لائق ( ب ) في الكشف الطبي , ولما سألت يعني ايه لائق ( ب ) قالوا يعني سلاح خفيف , هتقعد في مكتب ولا حاجه مش هتتعب !! 
انا ليه ماعملتش تظلم في حلمية الزيتون وطلعت طبي ..؟ 
انا ليه كسلت اروح أتظلم ..؟ 
هو ليه الدكتور اما شافني قالي ماتتظلمش عشان كده كده هتخش !! 
هو ليه مُشاة ..؟ 

( الصاعقه التانيه

بعد ساعتين كمان من القاعده , جه نقيب مخله قعد يتكلم شويه عن خطورة المخدرات .. وان عقوبتها في الجيش سنه حبس و 10 ألاف جنيه غرامه , وتطلع تكمل مُدتك !! 
وبعدين قالوا , هتترحلوا بكره , بكره تكونوا موجودين في منطقة الجيزه الساعه 7 الصبح عشان تتوزعوا علي مراكز التدريب !! 
ليه 7 الصبح ..؟ 
انا لسه مانمتش من اول امبارح !! 
ليه الجيزه ..؟ 
ليه مُشاة ..!! 

روحت علي العصر كده , ساكت , مبلم , مخنوق , ضايع .. 
ماكلمتش حد في البيت غير اني طلبت حجات شخصيه هاخدها معايا وانا مسافر .. ( الفجر
مانمتش برضو .. 
خرجت طول الليل مع اصحابي , قاعدين يضحكوا ويقطموني ..!! 
هما ليه مش حاسين بيا ..؟ 
ايه دهشور اللي قاعدين يقولوا عليها دي ..؟ 
هو ليه مُشاة ..؟ 

الساعه 3 الفجر , بدأت اتحرك من البيت .. 
هو ليه محدش في الطريق غيري ..؟ 
ليه الجو كان ساقع رغم اننا في عز الصيف ..؟ 
ليه مانمتش بقالي يومين حرفياً ..؟ 
ليه مُشاة ؟ 

اول مره هبعد عن البيت , اول مره اخرج من البيت اصلاً وانا عارف اني مش هرجع أنام بالليل فيه .. 
وانا اصلا مش عارف هنام فين ..!! 
وانا اصلا عايز انام لاني مطبق بقالي يومين ..!! 
وصلت في ميعادي لمنطقة تجنيد الجيزه .. ( يوم الحشر
الدنيا صيام ..!! 
والجو حر ..!! 
والشباب كلها داخله الجيش ..!! 
الشباب كلها مُشاة ..!! 

الساعه 9 الصبح طلع نقيب مخله يتكلم برضو , وفي اخر كلامه , أعلن ان الكانتين مفتوح .. بالعربي يعني اللي عايز يفطر عندنا أهلاً وسهلاً .. 

الساعه 9 وتلت .. 90% من الشباب كانوا بيفطروا .. 
الدنيا شمس , الجو ملزق , ريقي ناشف , مانمتش بقالي يومين .. 
والشباب رايحه جايه بالميه والشاي والسجاير والذي منه ..!! 
قررت أمسك نفسي , يمكن ربنا يكرمني بسبب صيامي !! 
كان اللي لسه صايمين عدد قليل , وكنا قاعدين جنب بعض .. 
الساعه 2 وتلت الضهر .. 
- كابتن , لو سمحت ممكن الميه اللي معاك دي ..؟ 
ليه هتتوضي ..؟ 
- لأ هفطر

فطرت , وولعت سجاير فـ سجاير فـ سجاير .. 
مصر كلها فطرت , كلنا في النار , مش لسه هنروحها !! 
كلام كتير مع ناس ماعرفهاش , فتي وهري كتير .. 
ماستحملتش البضان !! 
قررت ابحث عن مكان انام فيه لان كده بقالي 3 ايام مانمتش !! 
وملطوعين في الشمس ومش عارفين ايه الخطوه الجايه !! 
فكرت اني عايز ادخل الحمام , ودي كان اول مره في حياتي , أقف في طابور عشان أدخل الحمام !! 

الساعه 3 ونص , بدأ الصول ينده ع الاسماء ويديها كارنيهاتها .. 
( دهشور
انا رايح دهشور ..؟ 
انا ضيعت للدرجه دي يا مصر ..!! 
من لائق ( ب ) لـ دهشور ..!! 
( عبدالرحمن سامي محمود
- أفندم .. 
اركن جنب اخواتك .

النص ده رايح مشاة 1 في المعادي 
اما النص ده المغضوب عليهم رايحين مشاة 2 واخصائي في دهشور 
اما النص ده فـ رايح قويسنا .. 
- احنا في انهي نص يا كابتن ؟ انا ماسمعتش ؟ 
انتو فرحانين ليه ..؟ 
رايحين قويسنا ياعم , الحمد لله ربنا بعدنا عن دهشور !! 
- الحمد لله , يعني أفرح ؟ 


أول مره في حياتي كنت أترحل في اتوبيس مع شوية ناس كأننا غنم .. 
مفيش حراسه علينا .. 
اتوبيسات هلكانه .. 
الساعه 5 كنا وصلنا قويسنا !! 
المكان من بره شكله كويس , في شجر وزرع .. 
الجو ريحته زباله من المصانع الموجوده .. 
انا لسه مانمتش من 3 ايام !! 
المغرب أذن .. احنا كده كده فاطرين 
- لأ هتروحوا الميز عشان تفطروا , حتي لو فاطرين برضو هتروحوا !! 
ودي اول مره ادخل ميز !! 
مطعم بيساع 4.000 زبون .. 
الريحه تقرف الميت , المنظر يخوف .. الجو كتمه !! 
انا ليه جيت هنا ..؟ 
ليه ماروحتش المعادي ؟ 
الحمد لله اني ماروحتش دهشور .. 
ليه مانمتش اول امبارح كان زماني فايق شويه !! 
ليه مُشاة ؟ 

الشعب كله لابس أفرولات واسعه .. 
كل شويه قطيع من البشر يعدي وهو بيصرخ ندأت عجيبه .. 
رايحين فين ؟؟ 
رايحين ياكلوا .

كل ماحد يشوفنا يقولنا استحملوا اول يومين وبعدين هتتعودوا !! 
اشمعني اول يومين ؟؟ 
ايه اللي هيحصل ؟؟ 

جمعونا الساعه 9 بليل عشان نسلتم المخله !! 
انجس شئ في الجيش , اي شئ في " مخله
الجنه ماتبقاش جنه لو هتروحها ومعاك مخله !! 
شوال متروس لوازم السنه بتاعتك , وزنه اكتر من 70 كيلوا 
بتحسه انت 700 !! 
ومعاك حجات تانيه ؟؟ 
وتعبان طول اليوم !! 
ومانمتش بقالك 3 ايام ؟؟ 
ليه مُشاة ؟ 

الساعه 12 منتصف الليل .. 
خلصنا المخله خلاص , كل شويه ييجي عسكري ناقص يقعدنا ويقعد يطلع عقد النقص بتاعته فينا , يقعد يتكلم ويهري .. 
كل العساكر في الجيش بتحب تتكلم عن تجربتها , كل العساكر بتحب تهري !! 
من ده لـ ده لـ ده لـ ده الساعه بقت 3 الفجر !! 
انا مانمتش بقالي اكتر من 3 ايام كده !! 
هيغمي عليا ؟؟ 
إجمد , مش من اول يوم يقولوا عليك خرع !! 

( عنبر 4

بيتي الجديد لمدة شهر !! 
اتوزعت في عنبر 4 !! 
اول ما دخلت , رميت المخله وخرجت بسرعه .. 
عنبر فيه 44 عسكري .. 
مقفول بقاله فتره فالريحه زباله .. 
المراوح مش شغاله , النور مسري .. 
السراير لا تختلف عن الترولي بتاع مستشفي دقادوس .. 
كان فاضل 10 دقايق علي أذان الفجر .. 
شربت 4 سجاير في الـ 10 دقايق دول
الفجر أذن .. قررت أنام , منا لازم أنام , بقالي 4 ايام كده مادوقتش طعم النوم لساعه واحده .. 
السرير معووج , نمت علي الحرف عشان ماقعش علي اللي تحتي .. 
نمت كلي تقريباً علي 8 سم !! 
الساعه 4.15 الفجر .. 
الله هنام اخيراً رغم منظر العنبر المُرعب بعد ما الكل نام !! 
الساعه 5.15 الفجر .. 
نوبة صحيان !! 

انا مانمتش ..!! 
احنا لسه جايين من ساعه ازاي نوبة صحيان ؟؟ 
نلبس أفرول ..؟ 
هو الموضوع بقي بجد ولا ايه !! 
الافرول واسع !! 
بقيت أسقط وانا ماشي .. 
كلنا كنا بنسقط !! 
بس انا زياده عن اللزوم شويه .. 
انا مانمتش بقالي 4 ايام حرفياً .. 

طابور !! 
ميز !! 
شمس !! 
ميز !! 
طابور !! 
شمس !! 
ميز !! 
طابور !! 
شمس !! 
مشاة !! 
مشاة !! 
مشاة !! 

تكدير !! 
ليه ..؟ 
احنا لسه مانعرفش حاجه !! 
خناقات !! شتايم !! عميد ..؟ 
نوم !! ربع ساعه في اليوم ؟؟ 
يعني ايه أعصاب !! 
أسفلت برمل ساخن !! 
سواد !! 
هات كارنيهك ؟ 
طُلبه !! 
أغسل ايه ياسطي ؟؟ 
7.5 ألاف سيرفيس في اليوم ؟؟ 
لم زباله , هي حصلت !! 
فطار , فطار , فطار .. 
رمضان خلص من يوم 24 .. 
هو في حد في الجيش بيصوم ..؟ 
هو في حد مش في الجيش ..؟ 
هو في حد مش مُشاة ..؟ 
ياتري الناس عايشه بره لسه والدنيا ماشيه !! 
تعود .   





0 عايز تقول رائيك؟:

مازلت عايش في الحياه بكيفي